Wednesday, December 16, 2020

WANYONGE NI LAZIMA WALINDWE NA SHERIA-DKT MWIGULU


 Waziri wa Katiba na Sheria Mhe. Dkt. Mwigulu Nchemba akiongea na kamati ya Ulinzi na Usalama ya Mkoa wa Shinyanga alipofanya ziara ya kikazi mkoani humo.


Waziri wa Katiba na Sheria Mhe. Dkt. Mwigulu Nchemba akiongea na kamati ya Ulinzi na Usalama ya Mkoa wa Shinyanga (hawapo pichani)  alipofanya ziara ya kikazi mkoani humo.


XXXXXXXXXXXXXXXXXXXXXXXXXX

Serikali ya awamu ya tano inayoongozwa na Rais wa Jamhuri ya Muungano wa Tanzania Mhe Dkt. John Pombe Magufuli imejipambanua kuwalinda wanyonge hivyo anapojitokeza mtu yeyote kutaka kuwaumiza ni lazima ashughulikiwe kwa mujibu wa sheria na taratibu za nchi.
 
Waziri wa Katiba na Sheria Mhe Dkt. Mwigulu Lameck Nchemba ametoa angalizo hilo tarehe 15 Disemba 2020 wakati akizungumza kwenye kikao kazi na kamati ya ulinzi na usalama ikiongozwa na Mkuu wa Wilaya ya Kahama Mhe Anamringi Macha akiwa katika ziara ya kikazi ya siku moja Mkoani Shinyanga.
 
Nchemba amekemea vikali wananchi wanaotaka kuijaribu serikali inayoongozwa na Mhe Rais Dkt Magufuli kwa kupora haki za watu hivyo ameeleza kuwa lazima watu hao waonyeshwe kwamba serikali haijaribiwi na haki za wananchi haziwezi kuchezewa.
 
"Msihangaike na jambo limetokea wapi badala yake uhalisia utumike kufanikisha utoaji wa maamuzi, ndugu zangu Rais wetu ana maono ya kutetea haki hivyo sisi  wasaidizi wake tunapaswa kuhakikisha kuwa wananchi wanatendewa haki pasina kuonewa" Alikaririwa Mhe Mwigulu Nchemba
 
Awali akisikiliza malalamiko ya mkazi wa Mtaa wa Nyakato Kata ya Nyasubi katika Halmashauri ya Mji wa Kahama Bi Specious Silvester anayemlalamikia aliyekuwa mume wake Ndg Richard Majenga kwa kumfanyia jaribio la kumuua kwa kummwagia Tindikali pamoja na kumzulumu mali zake, Mhe Mwigulu amesema kuwa Sheria na mahakama imechezewa vya kutosha hivyo ni lazima sasa jambo hilo lifike kikomo na hatua kali kuchukuliwa.
 
Katika kikao kazi hicho Waziri Nchemba amemuagiza Mkuu wa Wilaya ya Kahama Mkoani Shinyanga kuandaa na kusimamia utaratibu wa kisheria kuhakikisha kuwa hakuna jambo lolote litakalofanyika ikiwemo mauziano bubu ya mali za mlalamikaji huyo hadi pale shauri lililoko mahakamani litakapokamilika.
 
Pia ameagiza kuwa Wataalamu wa sheria katika Hamashauri ya Wilaya ya Kahama waandikishe kisheria kuzuia mpango ovu unaoendeshwa wa uuzaji mali huku kesi ipo mahakamani ambapo mpango huo ameutaja kuwa ni dharau kwa mahakama kadhalika ameagiza ufanyike uchunguzi wa haraka kuhusu mali zote za wawili hao.
 
Akizungumzia Mali zingine ambazo tayari zimeshauzwa na zingine zimesalia, Waziri huyo ameagiza zifuatiliwe zote na endapo itabainika umiliki wake ulikuwa wa watu wawili huku mmoja akiuza kinyume na utaratibu basi uchunguzi ukibaini mtu huyo akamatwe na kuchukuliwa hatua za kisheria haraka iwezekanavyo.
 
Kuhusu jaribio la kuua kwa mama huyo kumwagiwa tindikali, Mhe Dkt Mwigulu amesema kuwa halipaswi kuishia hewani lazima lipewe ukubwa namba moja na uchunguzi ufanyike upya ili sheria iweze kuchukua mkondo wake kwani jambo hilo limepelekea ulemavu wa kudumu kwa mama huyo.
 
Kadhalika Waziri Mwigulu ametoa angalizo kwa watendaji wote kutekeleza wajibu wao kwa wakati kwani amesema kuwa Sheria isipochukua mkondo wake  kwa wakati wananchi huchukua sheria mkononi katika kutafuta haki zao.
 
Kwa upande wake Silvester Model ambaye ni baba mzazi wa Specious Silvester ameipongeza serikali kupitia Waziri wa Katiba na Sheria kutembelea eneo lenye mgogoro pamoja na kufanya maamuzi ambayo yametoa taswira ya utendaji uliotukuka wa serikali ya awamu ya tano inayoongozwa na Mhe Rais Dkt. John Pombe Magufuli.
 


Friday, December 11, 2020

ONGEZENI NGUVU KATIKA KUSIMAMIA HAKI ZA WANANCHI - MHE. NCHEMBA


 Waziri wa Katiba na Sheria Mhe. Mwigulu Nchemba akiongea na watumishi wa Tume ya Haki za Binadamu na Utawala Bora (hawapo pichani) alipofanya ziara katika ofisi ya Tume hiyo. Wengine pichani ni Naibu Waziri wa Wizara hiyo  Mhe. Geoffrey Mizengo Pinda (kulia) na mwingine ni Naibu Katibu Mkuu wa wizara hiyo Ndg. Amon Mpanju.


Mwenyekiti wa Tume ya Haki za Binadamu na Utawala Bora Mhe. Mathew Maimu (aliyesimama) akitoa taarifa ya utekelezaji kwa Waziri wa Katiba na Sheria Mhe. Mwigulu Nchemba alipotembelea ofisi za Tume hiyo.


Baadhi ya watumishi wa Tume ya Haki za Binadamu na Utawala Bora wakimsikiliza Waziri wa Katiba na Sheria alipofanya ziara katika ofisi za Tume hiyo.


XXXXXXXXXXXXXXXXXXXXXXXXXX

Waziri wa Katiba na Sheria Mhe. Mwigulu Nchemba aitaka Tume ya Haki za Binadamu na Utawala Bora kuongeza nguvu katika kusimamia na kusikiliza malalamiko ya wananchi.

Mhe. Nchemba ameyasema hayo alipofanya ziara ya kwanza ya kikazi katika Tume hiyo tangu alipoapishwa kushika wadhifa huo katika awamu ya pili ya serikali ya awamu ya tano.

Mhe. Nchemba alisema “changamoto kwa wananchi zinaendelea kukua hivyo ongezeni nguvu katika kazi yenu ya kusikiliza malalamiko yao”

Aliongeza, Tume inatakiwa iwafikie wananchi kule waliko   na waangalie maeneo ambayo wananchi wanakosa haki zao ili waweze kuwatembelea na kutatua changamoto zinazowakabili na kuwawzesha kupata haki hizo kwani maeneo mengi kuna uonevu mwingi na wanyonge kuporwa haki zao.

Alisisitiza kuwa eneo la haki za watu likifanyiwa kazi ipasavyo litasaidia wananchi kuzipata haki hizo kwani Tanzania ni taifa huru hivyo Tume inapaswa kujali wananchi na kuwahudumia wote kwa usawa.

Waziri aliongeza kuwa masuala ya haki za binadamu ni kipaumbele cha Serikali ya awamu ya tano hivyo wasitumie vichaka vya haki kutikisa haki za wananchi ni lazima maslahi ya nchi na wananchi yatangulizwe mbele.

Aidha, nae Naibu Waziri wa Katiba na Sheria Mhe. Geoffrey Mizengo Pinda alisema Tume ni taasisi iliyoundwa kusaidia jamii lakini kuna watu wanaotaka kupotosha uwepo wake hivyo Tume ya Haki za Binadamu iende kwa jamii ili waweze kuitambua na iwe rahisi kwao kuweza kuisaidia jamii hiyo.

Awali wakati akitoa taarifa ya utekelezaji kwa Mawaziri hao Mwenyekiti wa Tume ya Haki za Binadamu na Utawala Bora Mhe. Mathew Maimu alisema Tume imekuwa ikifanya kazi mbalimbali za kusaidia upatikanaji wa haki kwa jamii japokuwa imekuwa ikikabiliwa na uhaba mkubwa wa majengo ya ofisi na vitendea kazi.


Monday, November 16, 2020

MKUU WA MKOA WA TANGA ATAKA TAASISI ZA UTOAJI HAKI ZIBORESHWE ILI ZIWEZE KUTOA HAKI KWA WAKATI

 


XXXXXXXXXXXXXXXXXXXXXXXXXXXX

Mkuu wa Mkoa wa Tanga Mhe. Martin Shigella ataka taasisi za utoaji haki ziendelee kuboreshwa ili haki iweze kupatikana kwa wakati.

Mhe. Shigella aliyasema hayo wakati akifungua mafunzo kwa kamati za usalama za mkoa na Wilaya, kamati za maadili ya Mahakimu na Kamati za Parole mkoani Tanga ikiwa ni sehemu ya Maadhimisho ya Wiki ya Msaada wa Kisheria.

Mhe. Mkuu wa Mkoa aliwaambia viongozi hao kuwa wana dhamana kubwa ya kuhakikisha nchi ina utulivu, amani na usalama hivyo waitumie fursa hii ya kupata mafunzo hayo vizuri na kushirikishana na wengine.

“Tuna dhamana kubwa ya kuhakikisha utulivu, usalama na amani ya nchi tunaitimiza kwa Pamoja, tutumie fursa hii vizuri na tushirikishane” alisema Mhe. Shigella.

Aidha, Mkuu wa Mkoa amesema mamlaka za kutenda haki mkoani humo ikiwemo Mabaraza ya ardhi ya kata yamekuwa yakilalamikiwa sana kutokana na ufanisi wake ambao unasababishwa na watumishi wachache waliopo ambayo inasababisha ucheleweshwaji wa majukumu yao ikiwemo kupatikana kwa nakala za hukumu.

Aliongeza, Mkoani Tanga chama cha wanasheria kimeendelea kutoa msaada mkubwa sana wa kisheria kwa wananchi lakini bado hautoshelezi kwani matatizo ya kisheria ni mengi hivyo awaomba waendelee kujitangaza ili wananchi waweze kuwafahamu na kwenda kupata msaada wa kisheria. Pia aliahidi ofisi za Wakuu wa Wilaya na Ofisi ya Mkuu wa Mkoa zipo tayari kusaidia gharama ndogondogo ambazo zitahitajika kuendesha kesi za wananchi zinapoenda mahakamani.

“Msaada mnaotoa ni ibada na sehemu ya sadaka kwani unagusa Maisha ya watu wengi tena wengine kutoka mbali na mlipo hivyo mjitahidi kuwasikiliza na kuwasaidia” alisema Mhe.Shigella.

Aidha, Mkuu wa Mkoa alisema mafunzo haya yanayohusisha viongozi wengi wakiwemo mahakimu yamekuja wakati muafaka na wakati serikali ya awamu ya tano muhula wa pili unapoanza hivyo ana imani yatawasaidia katika kutekeleza majukumu yao.

 


Sunday, November 15, 2020

WAJUMBE WA MABARAZA YA ARDHI ACHENI KUPOKEA RUSHWA – MHE. NGUVIRA

 


XXXXXXXXXXXXXXXXXXXXXXXXX

 

Mkuu wa Wilaya ya Handeni Mkoani Tanga Mhe. Toba Nguvira awaasa wajumbe wa mabaraza ya ardhi wilayani humo kuacha tabia ya kupokea rushwa na kunyima haki wananchi.

Mhe. Nguvira aliyasema hayo wakati akifungua mafunzo ya utawala bora, Wosia na Mirathi kwa watendaji kata na wenyeviti wa mabaraza ya ardhi wilayani humu ikiwa ni sehemu ya maadhimisho ya Wiki ya Msaada wa Kisheria ambayo kitaifa yalizinduliwa tarehe 12 Mkoani Tanga.

Mkuu wa wilaya huyo aliwaambia watendaji kata na wenyeviti wa mabaraza ya kata hao wayatumie mafunzo hayo vizuri ili kumaliza migogoro mingi iliyopo ambayo inaanzia kwenye kata na inasababishwa na rushwa na hivyo kunyima haki baadhi ya wananchi.

“Migogoro ya ardhi na mirathi ni mingi sana nchini na inasababishwa na rushwa” alisema Mkuu wa wilaya huyo.

Aidha Mhe. Nguvira alisema sheria zimewekwa kuhakikisha haki inatendeke kwani kukosekana kwa haki kunapelekea machafuko katika jamii.

Mhe. Nguvira aliwasisitiza wajumbe wa mafunzo hayo kuyatendea haki kwa kuyatumia mafunzo watakayopata kuyatafsiri katika mabaraza ya kata.

Aimshukuru Mkuu wa Wilaya kwa nasaha zake kabla ya kuanza kw mafunzo mwezeshaji wa mafunzo hayo amabye pia ni Naibu Katibu kutoka Tume ya Kurekebisha Sheria Tanzania Bw. Calist Luanda alisema amepewa jukumu la kiutoa mafunzo kwa wajumbe hao hivyo awasisitiza wajumbe kuyafanyia kazi mafunzo watakayopewa ili waweze kuboresha kazi zao na kutoia haki kwa wananchi.


WATANZANIA TUWE NA UTAMADUNI WA KUANDIKA WOSIA KUEPUKA CHANGAMOTO ZA MIRATHI- JAJI MRUMA

 




XXXXXXXXXXXXXXXXXXXXXXXXXXXXXXXXX


Jaji Mfawidhi wa Mahakama Kuu ya Tanzania kanda ya Tanga Mhe. Jaji Amir Mruma amesema watanzania tuwe na utamaduni wa kuandika wosia kwani suala la usimamizi wa mirathi huwa linakuwa rahisi sana pale kunapokuwa na wosia wa marehemu kuhusu mgawanyo wa mali zake pindi atakapoondoka duniani.

“Mara nyingi wosia umekuwa ukirahisisha na kuondoa migogoro ya umiliki wa mali za marehemu na pia umekuwa ukibainisha nani atasimamia mali hizo kwa maendeleo ya familia husika” alisema Jaji Mruma.

Jaji Mruma ameyasema hayo wakati akizindua rasmi Maadhimisho ya Wiki ya Msaada wa Kisheria yanayofanyika kitaifa Mkoani Tanga kuanzia tarehe 12 hadi 18 Novemba, 2020 yakilenga kupunguza changamoto za kisheria kwa wananchi.

Mhe. Jaji Mruma alisema kwa utafiti walioufanya baada ya kukaa muda mrefu mahakamani wamegundua changamoto kubwa zaidi ya mirathi katika jamii inasababishwa na familia nyingi kutoandika wosia mapema kabla ya kufariki.

Aliongeza kuwa usimamaizi bora wa mirathi ni ule ambao unalenga kuleta manufaa na maendeleo kwa walengwa wa mali zilizoachwa na marehemu na si kumnufaisha msimamizi ambaye si mke au mume au mtoto wa marehemu.

Alisema “Wajane na watoto yatima wamekuwa wahanga wakubwa na wamedumbukia kwenye dimbwi la umasikini kutokana na baadhi ya wasimamizi au watu wasiohusika katika usimamiaji kujinufaisha na mali hizo jambo ambalo linaleta umasikini kwa baadhi ya familia”

Alisisitiza “usimamizi bora wa mirathi una muda mahsusi wa kuifunga mirathi husika na unabainisha mali itagawanywa au kuuzwa na warithi kugawana mali husika ili waweze kujiendeleza nayo”

Vilevile, Jaji Mruma alitoa rai kwa watoa elimu waliopangwa kuhudumia wananchi katika maadhimisho hayo wajue kuwa eneo hilo ni muhimu na linagusa wananchi wengi hivyo wanapaswa kutoa elimu na ushauri ipasavyo.

Naye Naibu Katibu Mkuu wa Wizara ya Katiba na Sheria Ndg. Amon Mpanju alisema Wizara hiyo inalengo la kutatua kero za wananchi hususan za kisheria ili kupunguza mashauri kwenye mfumo wa upatikanaji haki, hivyo Wizara ya Katiba na Sheria inahakikisha elimu inawafikia wanachi popote walipo ili kujua haki zao na namna gani wanaweza kuzifikia.

Aidha, Msajili wa Watoa Huduma za Kisheria kutoka Wizara ya Katiba na Sheria Bi . Felistas Joseph alisema Wizara na wadau wake wameamua kubadili mtindo wa kutoa huduma ya msaada wa kisheria kwa kuangalia upande mmoja wa wananchi peke yake na badala yake  kujenga uwezo wa upande wa pili ili wahitaji na watoaji wote wawe na uelewa wa masuala ya kisheria lakini pia uwezo wa kutatua kero hizo.

Bi. Felistas alisema “ katika mafunzo haya kutakuwa na makundi mbalimbali kuanzia ngazi ya kata, wilaya na Mkoa ambapo mada mbalimbali zitatolewa na wataalamu kutoka Wizara mbalimbali, Chama cha Wanasheria Tanganyika na Mashirika yanayotoa msaada wa kisheria”.

Aliongeza kuwa mafunzo hayo yanayofanyika Mikoa yote Tanzania Bara yanaenda sambamba na utoaji wa huduma ya msaada wa kisheria katika mikoa hiyo.

Maadhimisho haya yanaratibiwa na kusimamiwa na Serikali kupitia Wizara ya Katiba na Sheria kwa mara ya nne tangu kupewa mamlaka hayo chini ya sheria ya Msaada wa Kisheria ya mwaka 2017.

 

 

 


Monday, October 26, 2020

MAANDALIZI YA WIKI YA MSAADA WA KISHERIA YAANZA JIJINI TANGA


 


Kikao kazi cha maandalizi ya Wiki ya Msaada wa Kisheria chafanyika jijini Tanga na kufunguliwa na Katibu Tawala wa Mkoa Bi. Judica Omary.

Wednesday, October 21, 2020

WIZARA YA KATIBA KUSHIRIKIANA NA UNDP KUJENGA UELEWA KWA WANANCHI JUU YA UTAJIRI WA ASILI NA RASILIMALI ASILIA


 Kikao kati ya Menejimenti ya Wizara ya Katiba na Sheria na Shirika la Maendeleo la Umoja wa Mataifa (UNDP) cha kujenga uelewa wa jukumu la Wizara kuhusiana na Uangalizi na Usimamizi waUtajiri wa Asili na Rasilimali za nchi chafanyika Wizarani hapo Mtumba, jijini Dodoma.


Wataalam kutoka Shirika la Maendeleo la Umoja wa Mataifa (UNDP) wakifuatilia majadiliano wakati wa kikao chao na Menejimenti ya Wizara ya Katiba na Sheria.


Mkurugenzi wa kitengo cha Uangalizi wa Utajiri wa Asili na Rasilimali Asilia cha Wizara ya Katiba na Sheria  Bi Neema Mwanga akielezea jambo wakati wa kikao kati ya  Menejimenti ya Wizara ya Katiba na Sheria na Shirika la Maendeleo la Umoja wa Mataifa (UNDP).


Bi. Getrude kutoka kitengo cha mazingira UNDP akichangia mada.



Mkurugenzi Idara ya Huduma za Kisheria kwa Umma Bw. Griffin Mwakapeje akichangia mada.


Bw. Godfrey Mulisa kutoka UNDP akichangia mada.


Picha ya pamoja ya Menejimenti ya Wizara ya Katiba na Sheria na wataalam kutoka Shirika la Maendeleo la Umoja wa Mataifa (UNDP) baada ya kumaliza kikao chao.


XXXXXXXXXXXXXXXXXXXXXXXXXXXXXXXXXX

Serikali kupitia Wizara ya Katiba na Sheria yakubaliana na Shirika la Maendeleo la Umoja wa Mataifa (UNDP) kujenga uelewa kwa wananchi juu ya kulinda Utajiri wa Asili na Rasilimali Asilia za nchi.

Makubaliano hayo yamefikiwa katika kikao kati ya Menejimenti ya Wizara ya Katiba na Sheria na Maafisa kutoka UNDP kilichofanyika wizarani hapo Mtumba, jijini Dodoma.

Katika kikao hicho UNDP waliahidi kuandaa andiko ambalo ndilo litakalokuwa muongozo wa namna ya kutoa elimu kwa wananchi waweze kulewa dhana nzima ya utajiri wa asili na rasilimali asilia na namna ambavyo zinaweza kuwaletea maendeleo kwa wao binafsi na nchi pia.

Bw. Godfrey Mulisa ambaye ni mtaalam kutoka UNDP alisema Shirika lao litasaidia kuangalia ni namna gani watashirikiana kuongeza usimamizi wa utajiri wa asili na rasilimali asilia na kuhakikisha faida inapatikana kwa watanzania.

“Kubwa la kuangalia ni kuongeza usimamizi na kuhakikisha faida inapatikana kwa watanzania” alisema Bw. Godfrey

Naye Bi. Getrude kutoka kitengo cha mazingira kwenye shirika hilo alisema UNDP itashirikiana na kitengo cha Uangalizi wa Utajiri wa Asili na Rasilimali Asilia kilichopo wizarani hapo ili kukijengea uwezo kitengo hicho kiweze kufuatilia rasilimali na utajiri uliopo Tanzania ili kuweza kuinua uchumi wa nchi na wananchi kwani shirika hilo linaangalia sana maendeleo ya watu.

Awali akielezea kuhusu jukumu ililonalo Wizara ya Katiba na Sheria la kusimamia utajiri wa asili na rasilimali asilia Mkurugenzi wa Kitengo cha Uangalizi wa Utajiri wa Asili na Rasilimali Asilia Bi. Neema Mwanga alisema jukumu kubwa lililonalo ni kuangalia mifumo au mikataba iliyopo inahakikisha inalinda rasilimali za Taifa.

Aliongeza kuwa kitengo hicho kilianzishwa mwaka 2018 ili kuratibu na kuangalia maendeleo endelevu ya uvunaji na matumizi ya utajiri wa asili na rasilimali, pia kusajili na kuangalia mikataba inayohusu rasilimali asilia, na kupitia sheria, sera na miongozo ili zisiathiri matakwa ya Katiba.

Aidha, Mkurugenzi huyo alisisitiza Katiba inahitaji wananchi walinde rasilimali hivyo ni vyema wakapata elimu ya namna ya kulinda kwani uelewa mdogo wa jamii kuhusu sheria ni kikwazo katika kulinda rasilimali asilia.

Thursday, September 24, 2020

MAZUNGUMZO YA AMANI YATAJWA KUWA NJIA BORA NA SALAMA YA UTATUZI WA MIGOGORO NCHINI.




 
XXXXXXXXXXXXXXXXXXXXXXXXXXXXXXXXXXXXXXXX

Mazungumzo ya amani ni muarobaini uliothibitika kutumika kama tiba ya migogoro ya ardhi Mvomero Mkoani Morogoro.

 

Hayo yamesemwa na Mkuu wa Wilaya ya Mvomero Mhe. Albinus Mgonya wakati akitoa taarifa ya hali ya amani wilayani humo kwa Kamati ya Kitaifa ya Ujenzi wa Amani na Kuzuia Mauaji ya Kimbari iliyofika walayani kwake hivi karibuni.

 

Wakulima na wafugaji ni watanzania wanaoishi pamoja na kushirikiana katika shughuli mbalimbali za kijamii, kisiasa na kiuchumi katika maeneo wanaoishi na zaidi, wengi wao ni wakulima na ni wafugaji kwa wakati mmoja hivyo njia ya mazungumzo ya amani imejipambanua kuwa tiba ya utatuzi wa migogoro inayowakabili.

 

"Unajua, hawa wakulima na wafugaji wanafahamiana kwasababu wanaishi pamoja, matumizi ya nguvu hususani vyombo vya ulinzi na usalama isingekuwa muarobaini, badala yake kwa kuwakutanisha na kuzungumza nao kumeonesha kuwa ni suluhisho la migogoro na ujenzi wa amani na utulivu baina yao."

 

Kwa niaba ya wakulima na wafugaji ndugu Moringe Kwinasei ameungana na Mkuu huyo wa Wilaya kwa kuthibitisha hali ya uwepo wa utulivu na amani uliotokana na utatuzi wa migogoro kwa njia ya mazungumzo ya amani na kuwataka wakulima na wafugaji kuacha tabia ya uchochezi kwa kisingizio cha migogoro baina yao.

 

"Unajua sisi ni ndugu na wote tunahitajiana katika mambo mengi ikiwemo mazao ya mifugo na mimea ambayo ndiyo yanatugombanisha, tunagombana shambani baadae tunakaa hotelini tunakula wali-nyama! sasa kwanini tuendelee kugombania mambo ambayo ni sehemu ya mahitaji yetu muhimu? Ameongeza kwa kuuliza Martine Matingise.

 

Aidha, Mhe. Mgonya amesema Wilaya yake imeanzisha programu ya michezo mbalimbali hasa mashindano ya mipira wa Miguu kati ya Wakulima na wafugaji,  mbinu hii imeonesha kuwa na tija katika ujenzi wa amani katika Wilaya hiyo kwasababu michezo imewaleta wakulima na wafugaji pamoja na kuishi kwa upendo.

 

"Nimeanzisha na kuhamisisha michezo mbalimbali hasa mpira wa Miguu kati ya wakulima na wafugaji, na nimekuwa nikishiriki nao katika michezo husika. Kwakweli njia hii pia imeonesha mafanikio makubwa katika jitihada za Serikali katika ujenzi wa amani na kuzuia migogoro katika jamii." Amemaliza Mhe. Mgonya.

 

Kamati hii imehitimisha ziara yake ya utekelezaji wa majukumu muhimu ya Ujenzi wa Amani na Kuzuia Mauaji ya Kimbari katika Wilaya ya Mvomero mkoani Morogoro baada ya kufanya kazi kama hiyo katika Mikoa ya Arusha, Manyara na Rukwa.

 


Monday, September 21, 2020

PROF. MCHOME ATAKA WATANZANIA KUTUMIA VIZURI RASILIMALI ZILIZOPO NCHINI ILI KUJILETEA MAENDELEO


Katibu Mkuu Wizara ya Katiba na Sheria Prof. Sifuni Mchome akifungua kikao cha Makatibu Wakuu na Wakuu wa Taasisi cha kujadili Mfumo Jumuishi wa Uangalizi wa Utajiri wa Asili na Rasilimali za Nchi kilichofanyika jijini Arusha.

Washiriki wakichangia mada katika kikao cha Makatibu Wakuu na Wakuu wa Taasisi cha kujadili Mfumo Jumuishi wa Uangalizi wa Utajiri wa Asili na Rasilimali za Nchi. 
Washiriki wakiendelea na kikao.


Washiriki wa kikao wakiwa katika picha ya pamoja.

XXXXXXXXXXXXXXXXXXXXXXXXXXXXXXXXXXXXXXXXXX


Nchi ya Tanzania imebarikiwa utajiri wa asili na rasilimali asilia ambazo zikitumika ipasavyo nchi na wananchi wake watakuwa na maendeleo ya kiuchumi.

Hayo yamesemwa na Katibu Mkuu Wizara ya Katiba na Sheria Prof. Sifuni Mchome wakati wa kikao cha Makatibu Wakuu na Wakuu wa Taasisi za Serikali waliokutana jijini Arusha kujadili Mfumo Jumuishi wa Uangalizi wa Utajiri wa Asili na Rasilimali za nchi.

Profesa Mchome alisema Sheria ya Usimamizi wa Utajiri wa Asili na Maliasilia ilitungwa ili kuweza kusaidia kulinda rasilimali zilizopo nchini ili ziweze kuwanufaisha wananchi wake.

Alisema “Utajiri wa Asili na Maliasilia zinatakiwa zitumike kwa manufaa ya nchi na watu wake na sio kwa manufaa ya nchi za nje, mwaka 2017 tulitunga sheria ambayo ilisaidia kuweka miongozo jinsi gani tuenende katika eneo hilo na jinsi gani watu watafaidi  kutokana na maliasilia zao  na utajiri ambao upo katika nchi yao”.

Alisema, Wawekezaji wadogo wameanza kuongezeka na kufanya shughuli za uzalishaji kwa vibali halali na kwa uhuru bila kukimbizwakimbizwa na hivyo kuongeza pato la nchi.

Profesa Mchome alisisitiza, kwa sasa ardhi inatumika vizuri haitumiki kwa mtu mmoja kushika eneo kubwa bila manufaa yoyote kwa wananchi sasa ardhi inatumika na kuwapatia wananchi manufaa ambayo wanahitaji katika makazi, kilimo na maeneo mengine kwa hiyo malalamiko yameanza kupungua na wananchi wameanza kuwa wamiliki wa ardhi ambao ni utajiri wa asili na mali asilia unaozungumziwa.

Katibu Mkuu wizara ya katiba na sheria ,Profesa Sifuni Mchome amesema kuwa,endapo nchi yetu itazitumia rasilimali tulizonazo itasaidia sana kuharakisha shughuli za maendeleo Kama zilivyo kwa nchi zingine ambazo uchumi wao umeweza kukua kutokana na matumizi mazuri ya rasilimali hizo.

Aidha, Mhadhiri Mwandamizi wa Uchumi Chuo Kikuu cha Dar es Saalam (UDSM),Dokta Abel Kinyondo alisema kuwa,Kuna njia mbili za kuhakikisha wananchi wananufaika na Kodi na tozo mbalimbali zinazotokana na maliasili zetu  serikali inazitumia kwa namna ya kimkakati kuwarudishia wale walioko chini kabisa waweze kunufaika nazo.

Dokta Kinyondo alisema kuwa ,lazima tujue kuwa kwenye kufaidika zaidi na kwenye hela zaidi sio kwenye tozo na Kodi bali wananchi waunganishwe moja kwa moja katika mnyororo wa thamani katika maliasili kwani sehemu kubwa ya mapato inatokana na rasilimali.

Kwa upande wake, Mwakilishi Mkaazi wa UNDP, Bi Christine Musisi ambao ndio wafadhili wa kikao hicho, alisema wapo tayari kushirikiana na Serikali ya Tanzania kuhakikisha rasilimali za nchi zinalindwa na kunufaisha wananchi wake.

 


Monday, September 14, 2020

MAADILI KWA WATUMISHI WA UMMA NI TIBA YA AMANI NCHINI





 XXXXXXXXXXXXXXXXXXXXXXXXXXXXXXXXXXXXXX

Usimamizi thabiti wa maadili kwa watumishi wa umma katika kata na vijiji mkoani Morogoro umetajwa kuwa sababu ya kupunguza migogoro kati ya wakulima na wafugaji.

 

Hayo yamesemwa na Katibu Tawala wa Mkoa wa Morogoro Eng. Emmanuel N.M. Kalobelo alipotembelewa ofini kwake leo na Kamati ya Kitaifa ya Ujenzi wa Amani na Kuzuia Mauaji ya Kimbari.

 

Eng. Kalobelo amesema ukosefu wa maadili kwa watendaji wa kata na vijiji umeonekana kuwa kichocheo cha migogoro na uvunjifu wa amani katika maeneo mengi nchini lakini Serikali chini ya Mhe. Rais Dkt. John Joseph Pombe Magufuli imefanya kazi kubwa ya kulikomesha tatizo hilo mkoani Morogoro.

 

"Siku za nyuma Mkoa wa Morogoro ulikuwa kati ya mikoa yenye migogoro mingi ya ardhi kati ya wakulima na wafugaji lakini baada ya kufanya utafiti wa kina tukagundua watendaji na viongozi wa kata na vijiji walikuwa ndiyo chanzo kwani waliidhinisha uuzaji wa maeneo yasiyopimwa bila kufuata taratibu sahihi." Amesema Eng. Kalobelo.

 

Baada ya kubaini kinachofanyika na watendaji hao, Serikali ya Mkoa kwa kushirikiana na wananchi wa maeneo husika tumesimamia kwa nguvu maadili kwa kutumia mbinu mbalimbali kwa mafanikio na sasa wanafanya kazi zao kiweledi jambo lililopunguza tatizo kwa kiasi kikubwa.

 

Aidha Katibu Tawala huyo wa Mkoa wa Morogoro amesema wameendelea kushughulikia na kusimamia upimaji wa ardhi pamoja na ugawaji wa maeneo husika ikiwa ni pamoja na kutenga maeneo ya wakulima na wafugaji kupunguza migogoro ya ardhi katika mkoa huo na Wilaya zake.

 

"Kupitia Wizara ya Ardhi, Nyumba na Maendeleo ya Makazi tumeanzisha Ofisi ya kusimamia Mpango wa Matumizi Bora ya Ardhi ulisaidia kupima maeneo na kusimamia ugawaji wake kwa kuyatenganisha ili wakulima wawe na maeneo yao na wafugaji pia wawe na maeneo yao, mpango huu umesaidia kuzuia muingiliano wa shughuli za kilimo na  ufugaji." Ameongeza Eng. Kalobelo.

 

Kamati hii ya Kitaifa ya Ujenzi wa Amani na Kuzuia Mauaji ya Kimbari iliundwa mwezi  Februari, 2012 chini ya Itifaki ya Kuzuia Mauaji ya Kimbari  iliyoridhiwa na Serikali ya Tanzania kupitia Mkataba wa nchi za Maziwa Makuu wa Usalama, Utulivu na Maendeleo (The Pact on Security, Stability and Development in the Great Lakes Region).

 

Kamati hiyo inayoongozwa na Mwenyekiti wake Felistas Mushi wa Wizara ya Katiba na Sheria inaundwa na Wataalamu wanne ambao ni Miraji Magai Maira wa Taasisi ya Mwalimu Nyerere ambaye pia ni Katibu wa Kamati, Saleh Ambika wa Wizara ya Mambo ya Ndani (Jeshi la Polisi), Lina Kitosi kutoka Ofisi ya Waziri Mkuu na Pius Katani kutoka Ofisi ya Rais Ikulu.

 

Kamati hiyo  ya watalaamu watano imefika Ofisi ya Mkuu wa Mkoa wa Morogoro na kuonana na Katibu Tawala Eng. Emmanuel Kolobelo kabla ya kuelekea Mvomero kukagua utekelezaji wa masuala ya Ujenzi wa Amani inayohusisha rasilimali na hatimaye kusababisha mapigano na hata mauaji kati ya wakulima na wafugaji, wawekezaji na wananchi na wakati mwingine wananchi wenyewe kwa wenyewe.

 

 


WATUMISHI WIZARA YA KATIBA NA SHERIA WASISITIZWA KULINDA MALI ZA UMMA


 Katibu Mkuu wa Wizara ya Katiba na Sheria Prof. Sifuni Mchome ambaye ni mwenyekiti wa baraza la wafanyakazi la wizara hiyo akiongoza mkutano huo katika ukumbi wa mikutano wa Mamlaka ya Hifadhi ya Ngorongoro.


Wajumbe wa baraza la wafanyakazi la Wizara ya Katiba na Sheria wakiendelea na mkutano huo.


Zoezi la kuhesabu kura za uchaguzi wa Katibu wa baraza likiendelea.


Katibu wa Baraza la wafanyakazi Wizara ya Katiba na Sheria Bi Basuta Milanzi (kushoto) akiwa na Katibu Msaidizi wa Baraza hilo Bw. Felix Chakila baada ya kuchaguliwa kushika nafasi hizo.


Naibu Katibu Mkuu Ndg. Amon Mpanju akiwa amegusa kwa fimbo mchanga unaohama.


Wajumbe wa Baraza la wafanyakazi wa Wizara ya Katiba na Sheria wakiwa mbele ya mchanga unaohama.

Nyumbu ni moja ya wanyama ambao ni vivutio vilivyopo katika bonde la Ngorongoro.


XXXXXXXXXXXXXXXXXXXXXXXXXXXXXXXXXX


Watumishi wa Wizara ya Katiba na Sheria wametakiwa kulinda mali za umma kama za kwao binafsi ili ziweze kudumu na kutumika kwa muda mrefu.

Maelekezo hayo yametolewa na Katibu Mkuu wa Wizara ya Katiba na Sheria Prof. Sifuni Mchome ambaye pia ni Mwenyekiti wa  Baraza la Wafanyakazi wa Wizara hiyo wakati akifungua mkutano wa Baraza hilo uliofanyika katika ukumbi wa mikutano wa Mamlaka ya Hifadhi ya Ngorongoro jijini Arusha.

“Watumishi wote tunatakiwa kulinda mali za umma kama za kwetu binafsi na kuzitumia kwa uangalifu mkubwa ili ziweze kudumu kwa muda mrefu”Alisema Prof. Mchome

Aidha, Prof. Mchome aliwaasa watumishi hao kuwa waadilifu kwa kutokunywa pombe wakiwa kazini, madereva wasibebe abiria njiani wanapokuwa safarini, pia watumishi wasiondoke na vifaa vya ofisi kwenda navyo nyumbani.

Mbali na hayo, Prof. Mchome alizitaka Idara na Vitengo katika Wizara hiyo kuwa na utaratibu endelevu wa kufanya vikao vya ndani mara kwa mara ili kubaini na kutatua changamoto zilizopo ndani ya Idara na Vitengo na kuepuka malalamiko kutoka kwa watumishi wa chini.

Alisema ,“Idara na Vitengo viwe na utaratibu endelevu wa kukaa vikao vya ndani ili kujua na kutatua changamoto mbalimbali zilizopo ndani ya Idara na Vitengo vyenu”.

Kwa upande wake Naibu Katibu Mkuu wa Wizara hiyo Ndg. Amon Mpanju aliwaeleza watumishi ambao ni wajumbe wa baraza hilo kurudi kwenye misingi ya utumishi wa umma na kuvaa ipasavyo kwa kuzingatia waraka wa mavazi uliotolewa na Manejimenti ya Utumishi wa Umma.

“Watumishi mnatakiwa mrudi kwenye misingi ya utumishi wa umma kwa kuzingatia waraka wa mavazi uliotolewa na menejimenti ya utumishi wa umma na sio mtumishi kuvaa mavazi yasiyostahili kwenye utumishi wa umma”, alisema Naibu Katibu Mkuu huyo.

Katika mkutano huo wajumbe walipata nafasi ya kusikiliza mada mbili ambazo ni haki na wajibu wa mjumbe wa baraza la wafanyakazi pamoja na wajibu wa chama cha wafanyakazi katika baraza la wafanyakazi na mahala pa kazi iliyotolewa na Katibu wa TUGHE Mkoa wa Manyara Bw. Samwel Said na mada ya pili  ilikuwa ushirikishwaji wa wafanyakazi iliyotolewa na Afisa kazi Mkuu Mfawidhi Mkoa wa Manyara Bw. Perfectos Kimaty.

Awali kabla ya kuanza kwa mkutano huo wajumbe walipata nafasi ya kuchagua Katibu wa Baraza na Katibu Msaidizi kwani waliokuwepo wamemaliza muda wao. Katika uchaguzi huo Bi Basuta Milanzi alichaguliwa kuwa Katibu wa Baraza hilo baada ya kumzidi mshindani wake Bw. Felix Chakila ambaye alichaguliwa kuwa Katibu Msaidizi.

Mbali na kikao hicho, wajumbe walipata nafasi ya kufanya utalii wa ndani kwa kutembelea hifadhi ya Ngorongoro na kujionea vivutio vilivyopo katika hifadhi hiyo ikiwemo wanyama kama vile Nyumbu, Pundamilia, Faru na pia kuona mchanga unaohama.

 



Tuesday, September 8, 2020

KASI YA MAENDELEO YATAJWA KUWA KICHOCHEO CHA AMANI NCHINI




 


XXXXXXXXXXXXXXXXXXXXXXXXXXXXXXXXXXXXXXXXXXXXXXX

Kasi ya maendeleo yatajwa kuwa kichocheo cha amani nchini.

Hayo yamesemwa na Mkuu wa Wilaya ya Sumbawanga Dkt. Khalfan Haule alipotembelewa na Kamati ya Kitaifa ya Ujenzi wa Amani na Kuzuia Mauaji ya Kimbari ofisini kwake leo.

 

Dkt. Haule ametaja mafanikio yaliyofanywa na Rais wa Awamu ya Tano Mhe. Dkt. John Joseph Pombe Magufuli katika Sekta za Afya, Elimu, Barabara, Umeme, Maji na upatikanaji haki kwa wakati kuwa ni kichocheo cha ujenzi wa amani na utulivu hapa nchini.

 

"Huduma za jamii kama maji, elimu, umeme, afya, usafiri na usafirishaji ni haki ya msingi ya kila mwananchi. Naipongeza Serikali yangu chini ya Rais wetu mpendwa Dkt. John Joseph Pombe Magufuli kwa kuyapa kipaumbele masuala haya muhimu katika ujenzi wa amani na uchumi wa Taifa kwa kwa ujumla" amesema Dkt Haule.

 

Mwananchi akipata haki ya maendeleo kwa kuboreshewa na kusogezewa karibu huduma za jamii na nyingine hawezi kujihusisha na migogoro yoyote katika jamii kwani akili yake inakuwa imetulia, hivyo kujielekeza katika kufanya shughuli za maendeleo na kujipatia kipato, ameongeza Dkt. Haule.

 

Hata hivyo, Dkt. Haule ameiomba Serikali kuendelea kuweka mkazo na juhudi katika kuhakikisha huduma za jamii zinawafikia wananchi wote katika maeneo yao kama inavyojieleza katika Ilani ya Uchaguzi ya Chama Cha Mapinduzi ya Mwaka 2020/2025.

 

Kwa upende wake Katibu wa Kamati ya Kitaifa ya Ujenzi wa Amani na Kuzuia Mauaji ya Kimbari Bwn. Miraji Magai Maira wakati akimshukuru Mkuu huyo wa Wilaya ya Sumbawanga amesema wanalazimika kufika kwa wananchi na kukutana na makundi mbalimbali ya vinaja, wafugaji, wakulima, Walemavu, viongozi wa Mira na viongozi wa dini kwasababu huko ndiko migogoro inakoanzia na isiposhughulikiwa kwa wakati huhatarisha amani ya nchi.

 

Kamati ya Kitaifa ya Ujenzi wa Amani na Kuzuia Mauaji ya Kimbari iliyoanzishwa Februari, 2012 chini ya itifaki ya Kuzuia Mauaji ya Kimbari na kuridhiwa na serikali ya Tanzania kupitia Mkataba wa nchi za Maziwa Makuu wa Usalama, Utulivu na Maendeleo itaendelea na mkakati wa utekelezaji wa majukumu yake ya msingi ya kujenga na kudumisha amani na utengamano kwa kufanya vikao vya ujenzi wa amani kwa siku mbili katika mkoa wa Rukwa, Wilaya ya Sumbawanga na baadae kumalizia vikao hivyo mkoani Morogoro.

 


Saturday, August 29, 2020

WATAALAM WA SHERIA KUTOKA WIZARA YA KATIBA NA SHERIA NA TAASISI NYINGINE WAJADILIANA KUHUSU MAREKEBISHO YA SURA YA 16





Wataalam kutoka Wizara ya Katiba na Sheria na Wizara na Taasisi nyingine za Serikali wakiwa katika majadiliano ya mapitio ya sheria ya kanuni ya adhabu sura ya 16. wataalam hao walianza kupitia vifungu kimoja baada ya kingine vya sura ya 16 katika mafungu waliyogawana na sasa wanaendelea na majadiliano ya namna ya kuvirekebisha vifungu vilivyoonekana vinamapungufu na haviendani na wakati wa sasa. 

Thursday, August 27, 2020

WADAU WA UJENZI WA AMANI WAMPONGEZA RAIS MAGUFULI




 

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Wananchi wa Ngorongoro wamempongeza Rais wa Jamhuri ya Muungano wa Tanzania Mhe. John Pombe Joseph Magufuli kwa kujenga na kudumisha amani nchini.

 

Wameyasema hayo wakati wa Kikao na Kamati ya Kitaifa ya Ujenzi wa Amani na Kuzuia Mauaji ya Kimbari kilichofanyika leo katika ukumbi wa Halmashauri ya Wilaya ya Ngorongoro, Mji mdogo wa Loliondo jijini Arusha.

 

Katika kikao hicho kilichohusisha viongozi wa Halmashauri ya Wilaya ya Ngorongoro, Wadau wa Amani ambao ni wakulima na wafugaji katika Wilaya hiyo pamoja na Wataalamu wa Kamati ya Kitaifa ya Amani kimelenga kubaini viashiria au vyanzo vya migogoro inayohusisha rasilimali na kusababisha uvunjifu wa amani ili kuitafutia suluhisho la kudumu kabla haijaleta madhara kwa wananchi na Taifa kwa ujumla.

 

“Tunamshukuru Mhe. Rais Magufuli kwa uongozi wake makini uliojaa busara na hekima na kuwezeha kuwa na amani katika jamii yetu. Siku hizi hatugombani na unaweza kuuza ng’ombe hata 1000 na ukatembea huku umeshika pesa mkononi na ukawa salama jambo ambalo halikuwepo hapo zamani Mbung’ai Ole Sasi.

 

Kwa upande wake Katibu wa Kamati ya Kitaifa ya Ujenzi wa Amani na Kuzuia Mauaji ya Kimbari Bw. Miraji Maira amewashukuru wadau wa Amani walioshiriki kwa kubainisha viashiria vya migogoro na kuahidi kuyafanyia kazi. Aidha, Katibu Maira amesema amefurahishwa kuona watu wanashuhudia kazi kubwa inayofanywa na Mhe. Rais John Pombe Joseph Magufuli na kuwataka waendelee kumuunga mkono kwa kuendelea kujenga amani katika jamii kwani ni wajibu wao na ikitokea migogoro waitatue kwa njia ya amani.

 

“Nimefurahi kusikia hamgombani badala yake mnatatua changamoto zenu kwa amani, endeleeni hivyo kwasababu wajibu wa kulinda amani upo mabegani mwenu, hakuna mtu mwingine wa kuwatatulia migogoro yenu” amesema Miraji Maira.

 

Kamati ya Kitaifa ya Ujenzi wa Amani na Kuzuia Mauaji ya Kimbari iliyoanzishwa Februari, 2012 chini ya itifaki ya Kuzuia Mauaji ya Kimbari na kuridhiwa na serikali ya Tanzania kupitia Mkataba wa nchi za Maziwa Makuu wa Usalama, Utulivu na Maendeleo kesho itaendelea na mkakati wa utekelezaji wa majukumu yake ya msingi ya kujenga na kudumisha amani na utengamano katika mikoa ya Manyara na baadae Rukwa na Morogoro.

 


Tuesday, August 25, 2020

KAMATI YA KUZUIA MAUAJI YA KIMBARI YAMTEMBELEA MKUU WA MKOA ARUSHA

Mkuu wa Mkoa wa Arusha Mhe. Idd Hassan Kimanta akiongea na kamati ya kuzuia mauaji ya Kimbari ilipomtembelea ofisini kwake jijini Arusha.

Mkuu wa Mkoa wa Arusha Mhe. Idd Hassan Kimanta akiongea na wajumbe wa kamati ya kuzuia mauaji ya Kimbari ilipomtembelea ofisini kwake.


XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Kamati ya Kitaifa ya Ujenzi wa Amani na Kuzuia Mauaji ya Kimbari inayongozwa na Felistas Mushi (Mwenyekiti) kutoka Wizara ya Katiba na Sheria imetembelea Ofisi ya Mkuu wa Mkoa Arusha.

 

Kamati hiyo  ya watalaamu watano imefika kwa Mkuu wa Mkoa Mh. Idd Hassan Kimanta kujitambulisha kabla ya kuanza utekelezaji wa majukumu yake ya msingi ya Ujenzi wa Amani Nchini katika Mkoa wa Arusha katika maeneo amabayo yamekuwa yakikumbwa na migogoro inayohusisha rasilimali na hatimaye kusababisha mapigano na mauaji kati ya wakulima na wafugaji, wawekezaji na wananchi na wakati mwingine wananchi wenyewe kwa wenyewe. 

 

Kamati hii iliundwa mwezi  Februari, 2012 chini ya Itifaki ya Kuzuia Mauaji ya Kimbari  iliyoridhiwa na Serikali ya Tanzania kupitia Mkataba wa nchi za Maziwa Makuu wa Usalama, Utulivu na Maendeleo (The Pact on Security, Stability and Development in the Great Lakes Region).

 

Wataalamu na Wajumbe katika Kamati hiyo ya Kitaifa ni Pius Katani kutoka Ofisi ya Rais Ikulu, Saleh Ambika wa Wizara ya Mambo ya Ndani (Jeshi la Polisi), Lina Kitosi kutoka Ofisi ya Waziri Mkuu na Miraji Maira wa Taasisi ya Mwalimu Nyerere ambaye pia ni Katibu wa Kamati.

 


Monday, August 24, 2020

WIZARA YA KATIBA NA SHERIA YAFANYA MAPITIO YA SHERIA YA KANUNI YA ADHABU SURA YA 16

 Mkurugenzi wa Idara ya Katiba na Ufuatiliaji Haki Bw. Patience Ntwina akitoa maelezo kwa watalaam wa kikao kazi kutoka Wizara, Idara na Taasisi za Serikali wanaofanya mapitio ya kanuni ya adhabu sura ya 16 mjini Morogoro. 

Mkurugenzi wa Idara ya Katiba na Ufuatiliaji Haki Bw. Patience Ntwina akitoa maelezo kwa watalaam wa kikao kazi kutoka Wizara, Idara na Taasisi za Serikali wanaofanya mapitio ya kanuni ya adhabu sura ya 16 mjini Morogoro.

Wataalam wakiendelea na majadiliano.

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Mkurugenzi wa Idara ya Katiba na Ufuatiliaji Haki wa Wizara ya Katiba na Sheria Bw. Patience Ntwina afungua kikao kazi kuhusu mapitio ya sheria ya kanuni ya adhabu sura ya 16.

Kikao kazi hicho cha siku 12 kinafanyika katika ukumbi wa TFS-Mbegu mjini Morogoro kinajumuisha wataalam kutoka  Wizara, Idara na Taasisi za Serikali.

Mkurugenzi Ntwina akizungumza na wataalam hao amesema “Wizara imepanga kufanya zoezi la mapitio ya sheria hii ili kuondoa maneno, maudhui na adhabu zisizoendana na wakati tuliono sasa”.

Katika kikao kazi hicho wataalam hao wanajadii namna ya kuondoa maneno, maudhui na adhabu zilizopitwa na wakati na kutoa mapendekezo juu ya nini kifanyike ili kuhuisha adhabu hizo ili ziendane na wakati kwani kwa sasa zinashindwa kushughulikia matukio ya uhalifu yanayotokea kwenye jamii.

Aidha, wataalam hao pia watapitia vifungu vya sheria ya mwenendo wa makosa ya jinai na uhujumu uchumi na kuandaa mapendekezo yatakayotumika kuweka utaratibu na mwenendo mzuri wa kushughulikia kesi katika mahakama kuu ili kupunguza mlundikano wa mahabusu katika magereza.

Sheria ya kanuni ya adhabu sura ya 16 ilitungwa wakati wa utawala wa kikoloni na imekuwa ikifanyiwa marekebisho mbalimbali ya vifungu yaliyogusa kushughulikia mahitaji yaliyojitokeza katika jamiii.