Saturday, August 29, 2020

WATAALAM WA SHERIA KUTOKA WIZARA YA KATIBA NA SHERIA NA TAASISI NYINGINE WAJADILIANA KUHUSU MAREKEBISHO YA SURA YA 16





Wataalam kutoka Wizara ya Katiba na Sheria na Wizara na Taasisi nyingine za Serikali wakiwa katika majadiliano ya mapitio ya sheria ya kanuni ya adhabu sura ya 16. wataalam hao walianza kupitia vifungu kimoja baada ya kingine vya sura ya 16 katika mafungu waliyogawana na sasa wanaendelea na majadiliano ya namna ya kuvirekebisha vifungu vilivyoonekana vinamapungufu na haviendani na wakati wa sasa. 

Thursday, August 27, 2020

WADAU WA UJENZI WA AMANI WAMPONGEZA RAIS MAGUFULI




 

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Wananchi wa Ngorongoro wamempongeza Rais wa Jamhuri ya Muungano wa Tanzania Mhe. John Pombe Joseph Magufuli kwa kujenga na kudumisha amani nchini.

 

Wameyasema hayo wakati wa Kikao na Kamati ya Kitaifa ya Ujenzi wa Amani na Kuzuia Mauaji ya Kimbari kilichofanyika leo katika ukumbi wa Halmashauri ya Wilaya ya Ngorongoro, Mji mdogo wa Loliondo jijini Arusha.

 

Katika kikao hicho kilichohusisha viongozi wa Halmashauri ya Wilaya ya Ngorongoro, Wadau wa Amani ambao ni wakulima na wafugaji katika Wilaya hiyo pamoja na Wataalamu wa Kamati ya Kitaifa ya Amani kimelenga kubaini viashiria au vyanzo vya migogoro inayohusisha rasilimali na kusababisha uvunjifu wa amani ili kuitafutia suluhisho la kudumu kabla haijaleta madhara kwa wananchi na Taifa kwa ujumla.

 

“Tunamshukuru Mhe. Rais Magufuli kwa uongozi wake makini uliojaa busara na hekima na kuwezeha kuwa na amani katika jamii yetu. Siku hizi hatugombani na unaweza kuuza ng’ombe hata 1000 na ukatembea huku umeshika pesa mkononi na ukawa salama jambo ambalo halikuwepo hapo zamani Mbung’ai Ole Sasi.

 

Kwa upande wake Katibu wa Kamati ya Kitaifa ya Ujenzi wa Amani na Kuzuia Mauaji ya Kimbari Bw. Miraji Maira amewashukuru wadau wa Amani walioshiriki kwa kubainisha viashiria vya migogoro na kuahidi kuyafanyia kazi. Aidha, Katibu Maira amesema amefurahishwa kuona watu wanashuhudia kazi kubwa inayofanywa na Mhe. Rais John Pombe Joseph Magufuli na kuwataka waendelee kumuunga mkono kwa kuendelea kujenga amani katika jamii kwani ni wajibu wao na ikitokea migogoro waitatue kwa njia ya amani.

 

“Nimefurahi kusikia hamgombani badala yake mnatatua changamoto zenu kwa amani, endeleeni hivyo kwasababu wajibu wa kulinda amani upo mabegani mwenu, hakuna mtu mwingine wa kuwatatulia migogoro yenu” amesema Miraji Maira.

 

Kamati ya Kitaifa ya Ujenzi wa Amani na Kuzuia Mauaji ya Kimbari iliyoanzishwa Februari, 2012 chini ya itifaki ya Kuzuia Mauaji ya Kimbari na kuridhiwa na serikali ya Tanzania kupitia Mkataba wa nchi za Maziwa Makuu wa Usalama, Utulivu na Maendeleo kesho itaendelea na mkakati wa utekelezaji wa majukumu yake ya msingi ya kujenga na kudumisha amani na utengamano katika mikoa ya Manyara na baadae Rukwa na Morogoro.

 


Tuesday, August 25, 2020

KAMATI YA KUZUIA MAUAJI YA KIMBARI YAMTEMBELEA MKUU WA MKOA ARUSHA

Mkuu wa Mkoa wa Arusha Mhe. Idd Hassan Kimanta akiongea na kamati ya kuzuia mauaji ya Kimbari ilipomtembelea ofisini kwake jijini Arusha.

Mkuu wa Mkoa wa Arusha Mhe. Idd Hassan Kimanta akiongea na wajumbe wa kamati ya kuzuia mauaji ya Kimbari ilipomtembelea ofisini kwake.


XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Kamati ya Kitaifa ya Ujenzi wa Amani na Kuzuia Mauaji ya Kimbari inayongozwa na Felistas Mushi (Mwenyekiti) kutoka Wizara ya Katiba na Sheria imetembelea Ofisi ya Mkuu wa Mkoa Arusha.

 

Kamati hiyo  ya watalaamu watano imefika kwa Mkuu wa Mkoa Mh. Idd Hassan Kimanta kujitambulisha kabla ya kuanza utekelezaji wa majukumu yake ya msingi ya Ujenzi wa Amani Nchini katika Mkoa wa Arusha katika maeneo amabayo yamekuwa yakikumbwa na migogoro inayohusisha rasilimali na hatimaye kusababisha mapigano na mauaji kati ya wakulima na wafugaji, wawekezaji na wananchi na wakati mwingine wananchi wenyewe kwa wenyewe. 

 

Kamati hii iliundwa mwezi  Februari, 2012 chini ya Itifaki ya Kuzuia Mauaji ya Kimbari  iliyoridhiwa na Serikali ya Tanzania kupitia Mkataba wa nchi za Maziwa Makuu wa Usalama, Utulivu na Maendeleo (The Pact on Security, Stability and Development in the Great Lakes Region).

 

Wataalamu na Wajumbe katika Kamati hiyo ya Kitaifa ni Pius Katani kutoka Ofisi ya Rais Ikulu, Saleh Ambika wa Wizara ya Mambo ya Ndani (Jeshi la Polisi), Lina Kitosi kutoka Ofisi ya Waziri Mkuu na Miraji Maira wa Taasisi ya Mwalimu Nyerere ambaye pia ni Katibu wa Kamati.

 


Monday, August 24, 2020

WIZARA YA KATIBA NA SHERIA YAFANYA MAPITIO YA SHERIA YA KANUNI YA ADHABU SURA YA 16

 Mkurugenzi wa Idara ya Katiba na Ufuatiliaji Haki Bw. Patience Ntwina akitoa maelezo kwa watalaam wa kikao kazi kutoka Wizara, Idara na Taasisi za Serikali wanaofanya mapitio ya kanuni ya adhabu sura ya 16 mjini Morogoro. 

Mkurugenzi wa Idara ya Katiba na Ufuatiliaji Haki Bw. Patience Ntwina akitoa maelezo kwa watalaam wa kikao kazi kutoka Wizara, Idara na Taasisi za Serikali wanaofanya mapitio ya kanuni ya adhabu sura ya 16 mjini Morogoro.

Wataalam wakiendelea na majadiliano.

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Mkurugenzi wa Idara ya Katiba na Ufuatiliaji Haki wa Wizara ya Katiba na Sheria Bw. Patience Ntwina afungua kikao kazi kuhusu mapitio ya sheria ya kanuni ya adhabu sura ya 16.

Kikao kazi hicho cha siku 12 kinafanyika katika ukumbi wa TFS-Mbegu mjini Morogoro kinajumuisha wataalam kutoka  Wizara, Idara na Taasisi za Serikali.

Mkurugenzi Ntwina akizungumza na wataalam hao amesema “Wizara imepanga kufanya zoezi la mapitio ya sheria hii ili kuondoa maneno, maudhui na adhabu zisizoendana na wakati tuliono sasa”.

Katika kikao kazi hicho wataalam hao wanajadii namna ya kuondoa maneno, maudhui na adhabu zilizopitwa na wakati na kutoa mapendekezo juu ya nini kifanyike ili kuhuisha adhabu hizo ili ziendane na wakati kwani kwa sasa zinashindwa kushughulikia matukio ya uhalifu yanayotokea kwenye jamii.

Aidha, wataalam hao pia watapitia vifungu vya sheria ya mwenendo wa makosa ya jinai na uhujumu uchumi na kuandaa mapendekezo yatakayotumika kuweka utaratibu na mwenendo mzuri wa kushughulikia kesi katika mahakama kuu ili kupunguza mlundikano wa mahabusu katika magereza.

Sheria ya kanuni ya adhabu sura ya 16 ilitungwa wakati wa utawala wa kikoloni na imekuwa ikifanyiwa marekebisho mbalimbali ya vifungu yaliyogusa kushughulikia mahitaji yaliyojitokeza katika jamiii.


Thursday, August 20, 2020

WIZARA YA KATIBA NA SHERIA YAJIPANGA KWA MABORESHO YA SEKTA YA SHERIA AWAMU YA PILI

Mratibu wa programu ya maboresho ya sekta ya sheria Bw. Emmanuel Mayeji (kulia) akifuatilia majadiliano ya taarifa ya utafiti wa kuhakiki visababishi vya changamoto zinazoikabili sekta ya sheria nchini kwa ajili ya maandalizi ya andiko la awamu ya pili ya programu ya maboresho ya sekta ya sheria yaliyofanyika jijini Morogoro. Mwingine pichani ni Kaimu Mkuu wa Taasisi ya mafunzo ya uanasheria kwa vitendo Tanzania ambaye ndiye alikuwa muongoza majadiliano hayo Dkt. Zakayo Lukumay.

Mratibu wa programu ya maboresho ya sekta ya sheria Bw. Emmanuel Mayeji akichangia mada.

Wakili wa Serikali Mwandamizi Bi. Anne Malipula akichangia mada.

Wadau mbalimbali wakifuatilia majadiliano.


XXXXXXXXXXXXXXXXXXXXXXXXXXXXXXXXXXXXXXXXXXXXX

Wizara ya Katiba na Sheria yajipanga kwa maboresho ya sekta ya sheria awamu ya pili kwa kujadili taarifa ya utafiti wa kuhakiki visababishi vya changamoto zinazoikabili sekta ya sheria nchini.

Majadiliano hayo ya siku moja  yamefanyika jijini Morogoro miongoni mwa wadau wa sekta ya sheria wakati wakijiandaa kuandika andiko la pili la kutekeleza programu ya maboresho ya sekta ya sheria.

Mratibu wa Programu hiyo Bw. Emmanuel Mayeji amesema katika awamu ya kwanza ya kutekeleza programu ya maboresho ya sekta ya sheria mafanikio makubwa yalipatikana na uboreshaji ulionekana katika upande wa mahakama, Taasisi ya mafunzo ya uanasheria kwa vitendo, Polisi na Magerezani.

"Mafanikio makubwa yamepatikana katika awamu ya kwanza ya uboreshaji hasa upande wa Mahakama, polisi , magereza na taasisi ya mafunzo ya uanasheria kwa vitendo Tanzania" alisema.

Aliongeza, Kabla ya kuanza kutekelezwa kwa andiko la awamu ya pili ya programu hiyo Serikali iliielekeza Wizara ya Katiba na Sheria kuainisha changamoto zilizojitokeza katika awamu ya kwanza ili ziweze kutatuliwa kabla ya kuanza kwa awamu ya pili.

Programu ya Maboresho ya sekta ya sheria awamu ya kwanza ilifanikiwa kujenga majengo mbalimbali ya mahakama, ofisi na nyumba za watumishi, kununua vitendea kazi na kutoa mafunzo kwa watumishi mbalimbali waliopo katika sekta ya sheria hii yote ni katika kuifanya sekta hii kufanya kazi zake ipasavyo na kutoa haki kwa wakati.



Friday, August 7, 2020

DKT. MWIGULU NCHEMBA ATEMBELEA OFISI YA WAKILI MKUU WA SERIKALI

 

Waziri wa Katiba na Sheria Dkt. Mwigulu Nchemba akifafanua jambo wakati akizungumza na Menejimenti ya Ofisi ya Wakili Mkuu wa Serikali, jijini Dar es Salaam.

Wakili Mkuu wa Serikali Bw. Gabriel Malata (kulia) akimkabidhi taarifa ya utekelezaji wa majukumu ya ofisi yake Naibu Katibu Mkuu wa Wizara ya Katiba na Sheria Ndg. Amon Mpanju (kushoto), jijini Dar es Salaam.


XXXXXXXXXXXXXXXXXXXXXXXXXXXXXXXXXXXXXX

Waziri wa Katiba na Sheria Dkt. Mwigulu Nchemba amewataka watendaji wa Ofisi ya Wakili Mkuu wa Serikali kutekeleza majukumu yao kwa weledi ili kuhakikisha haki inapatikana kwa ajili ya maslahi ya Taifa.

Akizungumza na menejimenti ya Ofisi ya Wakili Mkuu wa Serikali jijini Dar es Salaam alipofanya ziara ya kikazi katika ofisi hiyo Dkt. Nchemba amesema, hatapenda kuona uzembe unafanywa na mawakili wasomi wa serikali katika kusimamia haki.

“Mtendaji yoyote akifanya kosa ambalo litaleta madhara kwa taifa kupitia utendaji wake, atachukuliwa hatua za kisheria kwa kuwa atakuwa amehujumu uchumi” amesema Dkt. Nchemba.

Amesema, ni vizuri mawakili kuacha kufanya kazi kwa mazoea, badala yake kuendelea kulinda rasilimali za taifa kwa wivu mkubwa ili kuokoa mali za watanzania katika kutafuta haki.

 “Sitapenda kusikia jambo kubwa lenye maslahi kwa taifa linashindwa kufanikiwa katika kuhakikisha haki inapatikana kwani baadhi ya watu wamekuwa na tabia ya kuiba na kwenda kujificha katika kichaka cha sheria” amesema Dkt. Nchemba.

Hata hivyo, ameeleza kuwa anaamini watendaji wote wa Ofisi hiyo wataendelea kufanya kazi kwa uaminifu ikiwemo kutowaficha wahalifu.

Aidha, Naibu Katibu Mkuu wa Wizara ya Katiba na Sheria Ndg. Amon Mpanju ameeleza kuwa Ofisi ya Wakili Mkuu wa serikali ina umuhimu mkubwa katika kuhakikisha taifa linasonga mbele.

Ndg. Mpanju ameeleza kuwa baada ya matokeo ya uchaguzi mkuu, baadhi ya wagombea wamekuwa na tabia ya kupinga matokeo mahakamani kwa kuweka pingamizi, hivyo anatarajia kuona mawakili wasomi wanasimama kidete kuhakikisha haki inapatikana.

Kwa upande wake, Wakili Mkuu wa Serikali Bw. Gabriel Malata amesema kuwa ofisi yake ambayo imeanzishwa miaka miwili iliyopita imeweza kuokoa kiasi cha shilingi trilioni 11.4 katika uendeshaji wa mashauri ya madai ambayo yaliendeshwa ndani na nje ya nchi.

Amesema, ofisi yake inahakikisha inapata idadi ya mashauri yote ya madai yanayohusu serikali na mashirika ya umma ili kutambua mashauri yasiokuwa na tija pamoja na yenye maslahi kwa taifa.

Wakili Malata amesema Ofisi ya Wakili Mkuu wa Serikali itaendelea kufanya kazi kwa weledi ili kuhakikisha taifa linasonga mbele.

 


Tuesday, August 4, 2020

KIKAO CHA SADC SEKTA YA SHERIA CHAKUBALIANA UTAFITI UFANYWE KUGUNDUA KINACHOCHELEWESHA URIDHIWAJI WA ITIFAKI


Waziri wa Katiba na Sheria Mhe. Dkt. Mwigulu Nchemba akifungua kikao cha SADC  cha Mawaziri na Wanasheria Wakuu Ukumbi wa mwalimu Nyerere jijini Dar Es Salaam.

Katibu Mkuu wa Katiba na Sheria Prof. Sifuni Mchome akifungua kikao cha SADC  cha Makatibu Wakuu na Naibu Wanasheria Wakuu Ukumbi wa mwalimu Nyerere jijini Dar Es Salaam.


Kikao cha SADC kwa sekta ya Sheria kikiendelea.

Picha ya pamoja ya viongozi na wataalam baada ya kukamilika kwa kikao cha SADC cha sekta ya sheria, ukumbi wa Mwalimu Nyerere jijini Darv Es Salaam.

XXXXXXXXXXXXXXXXXXXXXXXXXXXXXXXXXXXXXXXXXXXXXX

Waziri wa Katiba na Sheria Mhe. Dkt. Mwigulu Nchemba ambaye ni Mwenyekiti wa SADC kwa sekta ya sheria asema kikao cha SADC kwa sekta ya sheria kimekubaliana utafiti ufanywe ili kugundua kinachochelewesha uridhiwaji wa itifaki.

Waziri Nchemba ameyasema hayo baada ya kumalizika kwa kikao cha Mawaziri wa Sheria na Wanasheria Wakuu wa nchi za SADC kilichofanyika jijini Dar Es Salaam katika Kituo cha Mikutano cha Mwalimu Nyerere.

Waziri Nchemba alisema katika kikao hicho wamekubaliana kutoweka ukomo wa uridhiwaji wa itifaki bali wafanye utafiti ili kujua sababu za ucheleweshwaji huo na japokuwa nchi zinatofautiana taratibu nyingine zinaenda Bunge na nyingine na Baraza la Mawaziri kwanza kujadiliwa kabla ya kuwasilishwa kikaoni, hivyo hiyo ni moja ya sababu ya ucheleweshwaji.

“ Tumekubaliana kutoweka ukomo wa uridhiwaji wa itifaki bali tujue tatizo la ucheleweshwaji” alisema Waziri Nchemba.

Katika majadiliano yao Waziri Nchemba amesema wamekubaliana masuala mengine kama takwimu yasubirie misimamo ya ndani ya nchi halafu ndipo iwasilishwe katika kikao ngazi ya Mawaziri na Wanasheria Wakuu ili yaweze kutolewa maaamuzi.

Aidha, Kabla ya kikao hicho kilitangulia kikao cha wataalam ngazi ya Makatibu Wakuu na Naibu Wanasheria Wakuu, walijadili mambo mbalimbali ikiwemo kasi ndogo katika uridhiwaji wa itifaki na waliona si jambo rahisi nchi zote kuamua kwa wakati mmoja hivyo kutokana na taratibu za ndani ya nchi kutofautiana, masuala ya kazi ambapoitifaki hii ilionekana ni ngumu kutekelezeka hivyo kikao kiliamua kuachana nayo na kutengeneza itifaki mpya.

Pia, Katibu Mkuu Wizara ya Katiba na Sheria Prof. Sifuni Mchome amesema katika kikao hicho kwa upande wa takwimu waliona kuna mambo hayajakamilika hivyo irudi katika ngazi ya wataalam ili yaweze kufanyiwa kazi kabla hayajaenda mbele kwa ajili ya maamuzi.

“ Kuna mambo ambayo bado hayajakamilika hivyo yarudi ngazi ya wataalam kabla hayajaenda mbele kwa ajili ya maamuzi”. Alisema Prof, Mchome.

Vilevile, itifaki nyingine iliyojadiliwa ni udhibiti wa silaha ndogo ambapo walikubaliana itifaki hii iwekewe muongozo ili kudhibiti uingizwaji wa silaha haramu na vyombo vya ulinzi vya nchi wanachama wa SADC vishirikiane kulinda amani na usalama wan chi.                                                                                                           

Akifunga kikao hicho Waziri Nchemba alisema ni kikao kizuri chenye tija, hakikuwa na mvutano wowote na mambo waliyokubaliana yaendelee na ambayo hayakukamilika yatarudi yafanyiwe kazi.

 


Sunday, August 2, 2020

MAANDALIZI YA MKUTANO WA SADC KWA SEKTA YA SHERIA


Maandalizi ya mkutano wa SADC kwa sekta ya sheria unaotarajiwa kufanyika kesho kwenye ukumbi wa Mwalimu Nyerere jijini Dar Es Salaam yakiendelea